काठमाडौं विश्वविद्यालयको शैक्षिक कार्यक्रम रुपन्देहीमा समेत अध्यापन हुने भएको छ ।

काठमाडौं । अब काठमाडौं विश्वविद्यालयको शैक्षिक कार्यक्रम रुपन्देहीमा समेत अध्यापन हुने भएको छ । विश्वविद्यालयको विस्तारित कार्यक्रम अन्तर्गत रुपन्देही जिल्लाको मणिग्रामस्थित रेडियन्ट कलेजमा सूचना प्रविधिको शैक्षिक कार्यक्रम बी टेक एड आईटी ( (B.Tech.Ed IT)) पढ्न पढाइ हुने भएको हो ।

हालै एक समारोहबीच कलेजमा यस कोर्सको अभिमुखीकरण कार्यक्रम सम्पन्न भएको छ । विश्वविद्यालयका विभागीय प्रमुख विनोद पन्तका अनुसार पहिलोपटक रुपन्देहीमा सञ्चालन हुने यस कोर्सबाट विद्यार्थीले नवीनतम प्रविधि र पाठ्यक्रममा आधारित शिक्षाबाट समग्र विद्यार्थी लाभान्वित हुनेछन् ।

कस्तो छ कोर्स ?

केयूको यो कोर्स ‘स्कुल अफ एजुकेसन’को स्टिम एजुकेसन विभाग अन्तर्गत राखिएको छ । यो चार वर्षे (आठ सेमेस्टर) १३६ क्रेडिट आवरको कोर्स हो । प्राविधिक तथा व्यावसायिक शिक्षामा आवश्यक पर्ने व्यावसायिक जनशक्ति उत्पादनमा यो कोर्स केन्द्रित छ । साथै कोर्स पढेपछि सूचना प्रविधि क्षेत्रका विभिन्न काम गर्न दक्ष हुन सकिन्छ ।

केयूले सन् २०२२ देखि मात्रै यो कोर्स सञ्चालनमा ल्याएको हो । सरल भाषामा बुझ्दा यो कोर्स शिक्षा र आईटी कोर्सको मिश्रण हो । यस कोर्सले टीभेट क्षेत्रको जनशक्तिको माग पूरा गर्ने बताइएको छ ।

पाठ्यक्रम

कोर्समा आईटीबाहेक शिक्षा तथा शिक्षण सम्बन्धी पनि पाठ्यक्रम राखिएको छ, जसमा करिकुलम डेभलपमेन्ट, एजुकेसनल साइकोलोजी, टीभेट इकोसिस्टम इन नेपाल, डिजाइनिङ अकुपेसनल करिकुलम आदि विषय छन् ।

त्यस्तै आईटीमा सफ्टवेयर डेभलपमेन्ट, सफ्टवेयर इन्जिनियरिङ, प्रोग्रामिङ ल्याङ्ग्वेज, डिजिटल लजिक, ई-लर्निङ म्यानेजमेन्ट सिस्टम लगायत अन्य विषय पढ्नुपर्छ । त्यस्तै यस कोर्समा विद्यार्थीले शिक्षण र व्यवहारिक काम गरी दुई ओटा इन्टर्नशिप गर्नुपर्ने हुन्छ ।

विश्वविद्यालयले यस विषयमा कोर कोर्स १८ क्रेडिट आवर, भोकेसनल पेडागोजिकल कोर्स २० क्रेडिट, स्पेसलाइजेसन इन आईटी ८० क्रेडिट आवर  र इन्टर्नशिप तथा रिसर्च १८ क्रेडिट आवर बराबर तोकेको छ ।