एनएसजेएफ पल्सर स्पोर्ट्स अवार्डमा एरिका उत्कृष्ट खेलाडी

एरिका गुरुङ कराँतेका उम्दा खेलाडी त हुन नै, उनका एउटा अर्को ठूलो विशेषता पनि छ । त्यो हो, मीठो बोली । वर्ष २०८० मा उनले त्यस्तो उपलब्धि चुमेकी थिइन्, जसलाई नेपाली खेलकुद इतिहासकै सबैभन्दा ठूलोमध्ये एक हो भनेर मज्जाले मान्न सकिन्छ । एरिकाले चीनको हाङचाउमा भएको एसियाली खेलकुदमा रजत पदक जितेकी थिइन् । यस्तोमा वर्ष ०८० मा महिलातर्फ उनी वर्ष खेलाडी नभएको भए को हुने थियो त ? यो त ‘ओपन सेक्रेट’ जस्तै थियो ।

नभन्दै एनएसजेएफ पल्सर स्पोर्ट्स अवार्डमा एरिका नै महिलातर्फ उत्कृष्ट खेलाडी घोषित भइन् । अनि उत्तिकै मीठो भाषामा भनिन्, ‘यो अवार्डले सपना देख्नलाई प्रोत्साहन गर्नेछ ।’ भएको के थियो भन्दा त्यो एसियाली खेलकुदमा रजत पदक जित्न अगाडिसम्म उनी खासै धेरै सुनिएको नाम थिएन् । तर उनले एउटा ठूलो सपना भने त्यही बेला बुनेकी थिइन्, कराँतेबाट ठूलो उपलब्धि आत्मसात् गर्ने । त्यसैले उनले बारम्बार भन्ने गरेकी थिइन्, केही ठूला प्राप्त गर्न सपना देख्नुपर्छ । यसका लागि मिहिनेत पनि गर्नुपर्छ । फल एक दिन त पाइन्छ नै । शुक्रबार आयोजित अवार्ड कार्यक्रममा उनले जसरी आफूलाई प्रस्तुत गरिन्, त्यो गज्जब थियो, आत्मविश्वासले पूरापूर भरिएको थियो । उनको थप भनाइ थियो, ‘रजत जित्नु त ठूलो उपलब्धि भयो नै । जति बेला मेरो अगाडि धेरै चुनौती थिए, त्यति बेला सहयोग गर्ने सबैलाई पनि धन्यवाद ।