नलबारीमा भव्यताका साथ दुर्गा पांचायन मन्दिरको शिलान्यास

बेलबारी / बेलबारी नगरपालिका– ९ स्थित नलबारीमा दुर्गा पांचायन मन्दिरको शिलान्यास गरिएको छ । विहिबार दुर्गा पांचायन मन्दिरव्यवस्थापन समितिको आयोजनामा भएको एक कार्यक्रमका बिच बेलबारी नगरपालिकाका प्रमुख दिलप्रसाद राइले मन्दिरको शिलान्यास गरेका हुन् ।

शिलान्यास कार्यक्रममा बोल्दै प्रमुख अतिथि राईले पालिकाको तर्फबाट मन्दिर निर्माणमा सक्दो सहयोग गर्ने प्रतिबद्धता व्यक्त गरेका छन ।

करिव ३ वर्ष अघि देउसी– भैलोबाट जम्मा भएको ७ लाख १३ हजारबाट मन्दिर निर्माणको परिकल्पना सुरु भएको समितिका सचिवबिनोद भण्डारीले बताएका छन ।१६ धुरमा मन्दिर र दुई कठ्ठा जमिनमा सभाहलको समेत योजना रहेको भण्डारीले बताए । कार्यक्रमकोअध्यक्षता गरिरहेका उक्त समितिका अध्यक्ष नरसिंह बहादुर खड्काले सहयोगको रकम जुट्ने क्रम जारी रहेको र धेरैले जिन्सि समानहरुपनि सहयोग गरिरहेको बताए ।

कार्यक्रममा बेलबारी–९ का वडा सदस्य हर्क बहादुर धिमाल र स्थानीय समाजसेवी हरि बहादुर धिमाललाई सम्मान गरिएको थियो । हर्कबहादुर धिमालले मन्दिर निर्माणका लागी रु दुई लाख ४० हजार र हरि बहादुर धिमालले रु दुई लाख सहयोग गरेका छन । त्यस्तै समाजसेवी गोपाल जंग कार्कीले मन्दिर निर्माणका लागी जग्गा दान गरेका छन ।

कार्यक्रममा विभिन्न समुदायका सांस्कृतिक नृत्य प्रस्तुत गरिएको थियो । नगर प्रमुख दिलप्रसाद राई , वडाध्यक्ष सालिग्राम बस्नेतलगायत विभिन्न संघ–संस्थाका प्रतिनिधिहरुको बाक्लो उपस्थिति रहेको थियो ।