मोरङ -३ मा त्रिपक्षीय भिडन्त, कसले मार्ला बाजी

यतिबेला देशैभरि मोरङ क्षेत्र नम्बर ३ को निर्वाचन चर्चाको विषय बनेको छ । नेकपा एमाले र नेपाली काँग्रेसका ‘चर्चित उम्मेदवारहरूको मुख्य प्रतिस्पर्धालाई हेरिएको यस क्षेत्रमा रेखा थापाको माहोल तातिएको देखिन्छ ।

विगतका निर्वाचनको परिणामलाई हेर्ने हो भने यो क्षेत्र कम्युनिष्टको ‘लाल किल्ला’ हो भन्दा फरक पर्दैन । तर गत संसदीय निर्वाचनमा नेपाली काङ्ग्रेसका सुनिल कुमार शर्माले पनि आफ्नो बलियो पकड देखाएका थिए ।

उक्त निर्वाचनमा बाम गठबन्धनमाबाट निर्वाचनमा होमिएका एमालेका भानुभक्त ढकालले ४२ हजार ४ सय १३ मत ल्याउँदा शर्माले ४०हजार ५ सय ६ मत ल्याएका थिए । उनी ढकालसँग १ हजार ९ सय ७ मतान्तरले मात्रै पराजित भएका थिए । गत स्थानीय तहको निर्वाचनलाई हेरेर यो पटक अनुमान लगाउन सकिने अवस्था छैन । चलचित्र क्षेत्रमा सफलता हात पारेकी थापाको उपस्थितिले आगामी निर्वाचनमा त्रिपक्षीय भिडन्त हुने पक्का छ ।

यतिबेला संगठनको आडमा निर्वाचनको नतिजा हात पार्ने दाउमा एमालेका ढकाल देखिन्छन् भने शर्मा गठबन्धनको साथ भएकाले ६०हजार मत ल्याएर जित्ने दाबी गरिरहेका छन् । यता थापा पनि मोरङ ३ ले परिवर्तन रोजेकाले आम मतदाताले साथ दिने दाबी गरिरहेकी छन् । यति हुँदाहुँदै पटक पटक मन्त्री भएर विवादित बनेका ढकाल प्रति कार्यकर्ता सन्तुष्ट छैनन । उता आफनै पार्टीका नेताहरुको अन्तरघातका कारण शर्मालाई पनि जित हासिल गर्न सहज देखिँदैन । कार्यकर्ता नै नभएको क्षेत्रमा थापालाई पनि चुनाव जितिहाल्न सहज भने छैन