न्वारान कुरिरहेको प्रदेश १

२६ असार। प्रदेश १ ले राजधानी त पायो तर नाम पाउन भने दलहरुबीच ठुलै घम्साघम्सी देखिएको छ । प्रदेश १ को नामाकरणका विषयमा दलहरूबीच छलफल जारी रहदा नेपाली कांग्रेसले भने औपचारिक रुपमा नाम प्रस्ताव गरेको छ। नेपाली कांग्रेस प्रदेश १ का प्रमुख सचेतक सुयर्माराज राईले पत्रकार सम्मेलन गरी प्रदेश १ को नाम कांग्रेसले ‘सप्तकोशी प्रदेश’ राख्न प्रस्ताव गरेको जानकारी दिएका छन् ।

राईले प्रदेश १ मा कोसी नै नभएको पहिचानपक्षधर र भौगोलिक पक्षधरबीच द्वन्द्व देखिएकाले मध्यमार्गी प्रस्तावका रुपमा सप्तकोशी प्रदेश नाम राख्न प्रस्ताव गरेको बताएका छन् । राइले ‘ प्रदेश १ को पहिचान झल्कने, ऐतिहासिकता, भौगोलिक आधार देखिने र सबैको अपनत्व पनि हुने भएकाले कांग्रेसले ‘सप्तकोशी प्रदेश’ नामाकरणको प्रस्ताव राखेको बताएका छन् ।’ उनले शुक्रबारको सर्वदलीय बैठकमै कांग्रेसले सप्तकोशी नाम राख्न प्रस्ताव गरेको दाबी गरेका हुन् । राईका अनुसार कांग्रेसले प्रस्ताव गरेको नामका विषयमा अन्य दलहरू पनि सकारात्मक देखिएकाले आगामी बैठकबाट सर्वसम्मत रुपमा प्रदेशको नामाकरण हुने विश्वास रहेको बताए ।

यसअघि भने नेपाली कांग्रेस र एमालेबीच कोसी प्रदेश नामबारे अनौपचारिक छलफल भएको विषय सार्वजनिक भएको थियो । एमालेले प्रस्ताव गरेको कोसी प्रदेशको विपक्षमा नेकपा माओवादी केन्द्र, एकीकृत समाजवादीलगायतका दलहरू देखिएका थिए । नेकपा माओवादी केन्द्रले किंरात प्रदेश, एकीकृत समाजवादीले कोसी किँरात र जनता समाजवादीले शेर्पालुङ कोसी किँरात प्रदेश नामाकरण गर्न प्रस्ताव राखेका थिए।

९० सदस्यीय प्रदेशसभामा ५ दलीय गठबन्धनमा ५० जना सांसद मात्रै छन्। प्रमुख प्रतिपक्षी एमालेका ३९ र राप्रपाका १ प्रदेश सांसद छन्। प्रदेशसभाबाट प्रदेशको नाम पारित गराउन आवश्यक ६० सांसद पुर्‍याउन एमालेको समर्थन आवश्यक पर्छ।