स्थानीय तह निर्वाचनमा टिकट वितरणमा आर्थिक चलखेल भएको ; कांग्रेस नेता शेखर कोइरालाको आरोप

नेपाली कांग्रेसका नेता डा. शेखर कोइरालाले स्थानीय तह निर्वाचनमा टिकट वितरण गर्दा आर्थिक चलखेल भएको आरोप लगाएका छन । मापदण्डविपरीत आर्थिक चलखेलमा परी इमानदार कार्यकर्तालाई पाखा लगाउने गरी टिकट वितरण गरेको उनको आरोप छ ।

उनले टिकट वितरणमा भएको अनियमिताको समीक्षा हुने भन्दै अहिले आफ्नो पार्टीका उम्मेदवारलाई जिताउन लागि पर्न पनि आपिल गरेका छन् । उनले एक विज्ञप्ति जारी गर्दै कांग्रेस नेता कार्यकर्तालाई यस्तो आग्रह गरेका हुन् । ‘टिकट वितरणमा आर्थिक चलेखल र अनियमितता भयो भन्ने कुराहरू यतिखेर सार्वजनिक भइरहेका छन्’, उनले भनेका छन् ‘त्यसको पीडा इमान्दार र निष्ठावान् कार्यकर्ताहरू भोग्दैछन्।’

उनले सिद्धान्त, मूल्यमान्यता र आदर्शप्रति प्रतिबद्ध नेता–कार्यकर्ता पार्टी छाडेर अन्य पार्टीमा ओत लाग्न पुगेको भन्दै चिन्ता व्यक्त गरेका छन् । कांग्रेस केन्द्रीय कार्यसमितिमा टिकट वितरण प्रक्रियामा कुन मापदण्ड अपनाइयो , निर्वाचन पछि पार्टी भित्र भएका विकृति, विसंगति र आर्थिक चलखेल सबै पक्षको समग्र समीक्षा गरिने उनले उल्लेख गरेका छन् । बेलबारीमा समेत टिकट वितरण न्यायपूर्ण नभएको भन्दै कांग्रेस नेता तथा कार्यकर्ताले असन्तुष्टि व्यक्त गरेका छन् ।

कोइरालाले कांग्रेस पार्टीको बिभिन्न तहका साथीहरु, भातृ तथा शुभेच्छुक संगठनहरुलाई दत्तचित्त भएर आपसी मनमुटाव थाँती राख्दै, पार्टीभित्र एकता कायम गर्दै चुनावी अभियानमा सहभागी हुन आग्रह गरेका छन् ।