हर्क साम्पाङलाई संघीय सांसद सुदन किरातीको साथ, श्रमदान गर्न धरान आइपुगे

साउन २०, धरान। धरान उपमहानगरपालिकामा भइरहेको महाश्रमदान अभियानमा श्रमदान गर्न संघीय सांसद सुदन किराती पनि  धरान आइपुगेका छन् ।

मेयर हर्क साम्पाङको अगुवाईमा धरान उपमहानगरले संचालन गरिरहेको श्रमदान महाअभियानलाई सहयोग गर्ने उद्देश्यले धरान आएको सांसद किरातीले फोन सम्बादमा जानकारि दिएका हुन् ।

भोजपुर जिल्लाबाट निर्वाचित संघीय सांसद तथा नेकपा (माओवादी केन्द्र) का नेता किरातीले श्रमदानको विषयमा सदनमा पनि चर्को आवाज उठाउँदै आउने नेताको रुपमा परिचित छन् । उनि सदनमा मात्र हैन मैदानमा पनि श्रमदान गर्न पछि नपर्ने नेताको रुपमा चिनिन्छन् । भोजपुरको विभिन्न विकास निर्माणसँगै जनतासँग विभिन्न क्षेत्रमा श्रमदान विगतदेखि नै गर्दै आएका छन । उनले कोरोना महामारिको संक्रमणकालमा भोजपुरमा श्रमदान मार्फत नै क्वारेण्टाइन निर्माण गरेका थिए । त्यसै गरि सडक निर्माणमा पनि उनले विगतमा धेरै स्थानमा जनतासँग श्रमदान गर्दै आएका थिए ।

यो अभियानमा पहिले नै जोडिने मन हुँदा हुँदै समयको अभावले भौतिक रुपमा जोडिन नपाएको उनी बताउछन् । भोली शनिबार श्रमदानमा सहभागी जनाउन धरान आइपुगेको सांसद किराती भन्छन्-जनतालाई यसरी विकासमा नजोडे समृद्धको नाराले सार्थकता पाउदैन ।

उनले श्रमदान गर्न धरान आएको आफ्नो आधिकारिक फेसबुकमार्फत समेत जानकारि गराएका छन् । उनले लेखेका छन्- ” म पनि धरान श्रम गर्न आउँदैछु । श्रमले नै मातृभूमि सजाउँ, श्रम गर्ने संस्कृती स्थापित गरौँ । मेयर हर्क साम्पाङको नेतृत्वमा धरान उपमहानगरले संचालन गरिरहेको श्रम अभियानमा म पनि सहभागी भएर ऐक्यवद्धता जनाउन आउँदैछु । धरानवासी महान जनसमुदायलाई भोलि शनिवार कामको मैदानमा नै भेट्नेछु । भ्रष्टाचारको विरुद्ध निर्मम बनौ, विकासलाई युद्धको रुपमा घोषणा गरौ ।”