तीन सातादेखि काम ठप्प पारेर किन आन्दोलनमा छन् धितोपत्र बोर्डका कर्मचारी ?

अहिले कर्मचारीहरूको मुख्य निशाना धितोपत्र बोर्डको नेतृत्वमाथि छ । मन्त्रालयको पत्रको सम्बन्धमा सरकारसँग वार्ता गर्न वा अदालत जाने विषयमा बोर्ड नेतृत्व उदासीनता देखाएको भन्दै उनीहरू अध्यक्ष सन्तोषनारायण श्रेष्ठ लगायत सञ्चालक समितिका सदस्यमाथि आक्रोशित भएका हुन् ।

बोर्डका कर्मचारी एवं फियनका केन्द्रीय समितिका उपाध्यक्ष राजुबहादुर जीसी मन्त्रालयको पत्र आएसँगै कर्मचारीले बोर्ड व्यवस्थापनलाई विभिन्न माग प्रस्तुत गरेको भए पनि पाँच दिनसम्म पत्र दर्ता समेत नगरिएको बताउँछन् ।

‘हामीले २ गते पत्र लग्यौं, ७ गते मात्रै दर्ता भयो । पत्र दर्ता भएको १७/१८ दिनपछि मात्रै हिजो बोर्डको बैठक बस्यो, तर हाम्रो बारेमा केही निर्णय भएन,’ जीसी भन्छन्, ‘यो अवस्था हाम्रो मागप्रतिको उदासीनता हो ।’

त्यसो त केही दिनअघि बोर्ड अध्यक्षसहित उच्च कर्मचारीले अर्थ मन्त्रालयको वित्तीय संस्था समन्वय महाशाखाका प्रमुखसँग छलफल गरेको थियो । तर सचिवको पत्रबाट गएको निर्देशनको सम्बन्धमा महाशाखा प्रमुखसँग छलफल भएर निष्कर्ष निस्किन सक्ने अवस्था थिएन । भेटघाटमा पनि मन्त्रालय आफ्ना मागप्रति सकारात्मक नभएको बुझिएको कर्मचारीहरूको भनाइ छ ।

तीन सातादेखि बोर्डको सेवा ठप्प छ, अझै कहिले खुल्छ भन्ने निश्चित छैन । बोर्डका कर्मचारीहरू भने माग पूरा नभएसम्म काममा फर्किने मनस्थितिमा छैनन् । उनीहरू भन्छन्, ‘यो साइकोलोजी लिएर कसरी काममा फर्किन सकिन्छ ?’