३४ दिनदेखि जारी विद्यार्थी आन्दोलन फिर्ता

त्रिभुवन विश्वविद्यालयअन्तर्गत मानविकी तथा सामाजिक शास्त्र सङ्कायका चारवटा केन्द्रीय विभागमा शुल्क समायोजन गर्नुपर्ने मागसहित ३४ दिनदेखि जारी विद्यार्थी आन्दोलन फिर्ता भएको छ ।

‘चर्को शुल्क’विरुद्धको आन्दोलनमा संलग्न अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) त्रि.वि. जिल्ला समिति र विश्वविद्यालय प्रशासनबीच मंगलबार भएको छलफलबाट शुल्क समायोजनसहित चार बुँदे सहमति भएपछि आन्दोलन फिर्ता गरिएको हो ।

छलफल त्रिभुवन विश्वविद्यालय अनुगमन निर्देशनालयका कार्यकारी निर्देशक विष्णुप्रसाद खनालको उपस्थितिमा सम्पन्न भएको थियो । सहमतिअनुसार अन्तर्राष्ट्रिय सम्बन्ध तथा कूटनीति, लैङ्गिक अध्ययन, सामाजिक कार्य र द्वन्द्व, शान्ति तथा विकास अध्ययन विभागहरूमा लिइँदै आएको शुल्क घटाएर रु. १,१०,००० (एक लाख दस हजार) कायम गरिनेछ । नयाँ शुल्क दर हालकै दोस्रो सेमेस्टरदेखि लागू गरिने जनाइएको छ ।

त्यसैगरी त्रिविको नियमानुसार विद्यार्थीलाई प्रदान गरिने छात्रवृत्ति सुविधा कार्यान्वयन गर्ने, विभागहरूमा आवश्यक भौतिक पूर्वाधार र जनशक्ति व्यवस्थापन गर्दै जाने पनि सहमतिको हिस्सा बनेको छ । सहमति अनुसार आन्दोलनरत विद्यार्थीहरूले मंगलबारदेखि नै आन्दोलनका सम्पूर्ण कार्यक्रम फिर्ता लिएका छन् ।

विद्यार्थी पक्षबाट ममता श्री जोशी (इन्चार्ज), प्रविण दाहाल (आन्दोलन कमान्डर), शिवराज भट्ट (कार्यवाहक अध्यक्ष), टिकेम्प चम्लागाईं ‘मनिष’ र कृष्णप्रसाद ओली (सचिव तथा आन्दोलन संयोजक) छलफलमा सहभागी थिए ।