यो निर्वाचनमा जसपा निर्णायक भुमिकामा: खगेन्द्र माखिम

मोरङ, बैशाख २१ । आगामी बैशाख ३० गते हुने स्थानीय तह निर्वाचनका लागि सबै दलहरु तयारीमा छन् । गठबन्धन सरकारले निर्वाचनमा तालमेल गरेर जाने भनेपनि आधिकांश ठाउमा तालमेल हुन सकेन । यसको असर गठबन्धनका सबै दलहरुलाई पर्छ नै । यहि कारण धेरै ठाउँमा मत परिणाममा पनि असर पर्ने देखिएको छ । यस्तो अवस्थामा मुख्य भुमिकामा जनता समाजवादि पार्टी जसपा रहने दाबि गर्छन जसपा लिम्बुवान राष्ट्रिय समितीका अध्यक्ष खगेन्द्र माखिम । यो चुनावमा हामि हार्दैनौ, कि त केही सिक्छौ, कि त जीत्छौ । माखिम भन्छन् ;“हामिले जीत्न नसके पनि कसलाई जिताउने र कसलाई हराउने भन्ने कुरामा हाम्रो महत्वपुर्ण भुमिका रहन्छ । यो निर्वाचनमा निर्णायक भुमिका हाम्रो पार्टीको रहनेछ ।” पहिलोउडानडटकमले जनता समाजवादी पार्टी लिम्बुवान राष्ट्रिय समितिका अध्यक्ष खगेन्द्र माखिमसंग स्थानीय निर्वाचनको सन्दर्भमा गरेको संक्षिप्त कुराकानी:

निर्वाचन कतिको लागेको छ ?
निर्वाचन त लागेको छ तर हामीलाई अन्य पार्टीहरु जस्तो फरक रुपमा लागेको छैन । हामी निर्वाचन खर्चिलो बनाउन हुन्न भन्नेमा छौ । हाम्रोलागि निर्वाचन अन्तिम गन्तव्य होईन । निर्वाचनमा हामी साम दाम,दण्ड,भेद सबै प्रयोग गरेर जीत्नु पर्छ नै भन्ने पक्षमा छैनौ । चुनावमा खाली हामीले पार्टीको निति, विचार र मुद्धालाई घरघरमा पुर्याउने मात्र हो । यो निर्वाचनमा हामी हार्दैनौ, कि त केही सिक्छौ, कि त जीत्छौ ।

निर्वाचनको तयारी कस्तो छ, कसरी अगाडि बढिरहनु भएको छ ?
हामी चुनावको लागि निर्णायक पार्टी हौ । हामी स्थानीय निर्वाचनको तेस्रो र चौथो स्थानमा रहेको पार्टी हौ त्यसैले कसलाई जिताउने वा हराउने भन्ने कुरामा हाम्रो भुमिका महत्वपुर्ण रहन्छ । यसरीनै चुनावी प्रचार प्रसार त भै नै हाल्यो । विशेष चाहि जनतालाई आफुले दिने मतको महत्व बारे पनि सचेतना गराउदैछौ ।

यो निर्वाचनपछि जनता समाजवादि पार्टीको स्थान के रहला ?
अहिलेको निर्वाचन प्रणालीमा, अहिलेको शासन व्यवस्थामा, अहिलेको जुन राजनीतिक व्यवस्था छ यस्तो अवस्थामा पहिलो, दोस्रो हुने दौडमा हामि छैनौ । हामी फरक राज्य सत्ता र व्यवस्था निर्माण गर्न चाहान्छौ । अहिलेको चुनाव चाहि यहि राज्य सत्ता यहि राज्य व्यवस्थालाई बलियो बनाउनका निमित्त भैरहेको कारण हामी यस निर्वाचनमा पहिलो हुन सक्ने कुरै भएन । पुरानो राज्य सत्तालाई परिवर्तन गरेर अब आउने निर्वाचनमा पहिलो हुने हाम्रो रणनीति हो ।

तपाईले भन्नु भएको परिवर्तन तर्फ जसपाको अबको कदम के हुन्छ ?
मुलरुपमा कुनै पनि संगठन वा पार्टी तीन चरणमा अगाडि बढ्छ । पहिलो फरमेसन, दोस्रो अस्तित्वको लागि लड्छ र तेस्रो चरणमा निर्माणको प्रक्रियामा जान्छ । हामी अहिले दोस्रो चरणमा छौ र अस्तित्वको लागि लडिरहेको छौ । यो चरणमा हामी कसैलाई परास्त गर्न सक्दैनौ तर जब अस्तित्व कायम हुन्छ तव मात्र प्रतिस्पर्धामा जान सक्ने स्थीति रहन्छ । अस्तित्वको लडाईको लागि संघर्ष गरीरहेको यो चरण पार गरेपछि मात्र हामीले चाल्ने कदमहरु, गर्ने कुराहरु अगाडि बढ्छ ।

निर्वाचन एकदमै नजिक छ , केही स्थानमा जसपा सहितका दलहरुले गठबन्धन गरेर चुनाव लड्दैछ, अधिकांश स्थानमा गठबन्धन हुन सकेन, कारण के हो ?
यो त निकै सजिलो प्रश्न भयो । हाम्रो समाज विविधता पुर्ण छ । तर यहाँ कुनै एक पार्टीले एक्लै अगाडि बढ्छु भन्दा के होला, भएको यहि हो । वास्तवमा यो गठबन्धन नै होईन । गठबन्धन सरकार छ, गठबन्धनमा भएका दलहरुबीच चुनावको लागि गरीएको तालमेल चाहि हो । गठबन्धन र तालमेलमा आकाश जमिनको फरक छ । तालमेल नहुनुको मुल कारण चाहि स्वार्थ हो । जुन स्वार्थ माओवादीमा देखियो ।

तालमेल नहुदा घाटा त सबै दललाई हुन्छ नै, अझ साना पार्टीहरुलाई बढि होला । यसले मत परिणाममा पनि असर त गर्ला नि ?
पक्कै पनि र यसको फाईदा एमालेलाई हुने देखिन्छ । यदि ईमान्दार पुर्वक तालमेल भएको भए केपि ओलिको अहमता मेटिन्थ्यो तालमेल हुन सकेन, यसको प्रत्यक्ष फाईदा एमालेलाई हुन्छ । यसले मत परिणाममा समेत असर पुग्छ ।

अन्त्यमा के भन्न चाहानुहुन्छ ?
भन्नै पर्ने कुरा युवाहरु जसरी अन्य क्षेत्रमा सक्रिय छन् । त्यसरीनै राजनीति पनि बुझ्न जरुरी छ । राजनीतिमै लाग्नु भन्दिन तर राजनीति बुझ्न जरुरी छ । युवाहरुलाई उर्जाशिल समयमा विदेश पठाउने नभई आफ्नै गाउँमा आफ्नै ठाउँमा रोक्ने व्यवस्था गर्न जरुरी छ । देश छोडेर देश बन्छ भन्नु, आफ्नो गाउँ छोडेर गाउँको विकास गर्छु भन्नु यो जतिको हावा कुरा केहि छैन । युवाहरुलाई आफ्नै देशमा रोक्ने वातावरण सिर्जना गर्न सबैले पहल गरौ भन्ने आग्रह गर्न चाहान्छु ।